2026 жылғы 12 наурызда экономика ғылымдарының магистрі, Қаржы және экономика кафедрасының аға оқытушысы Уразова Б.А. 6В04102–Экономика және 6В04104–Мемлекеттік және жергілікті басқару білім беру бағдарламаларының 1-курс студенттері үшін «Академиялық жазылым» пәні аясында практикалық-бағдарланған ашық сабақ өткізді. Сабақ Білім және менеджмент институтының кітапханасында ұйымдастырылды, бұл ғылыми жұмысқа тереңірек бойлауға ықпал ететін қолайлы академиялық орта қалыптастырды. Кітапханада өткізілуі студенттерге ғылыми дереккөздермен, каталогтармен және ғылыми әдебиеттермен жұмыс істеудің нақты ғылыми ортасымен танысуға мүмкіндік беріп, академиялық атмосфераны қамтамасыз етті.
Сабақтың негізгі мазмұны Умберто Эко жазған «Как написать дипломную работу» атты еңбегіндегі ұсынымдарға негізделген дипломдық жұмысты даярлау мәселелеріне арналды.
Умберто Эко — итальяндық жазушы, ғалым және философ, ғылыми және педагогикалық қызметте мол тәжірибесі бар тұлға. Оның ұсынымдары Болонья университетінде студенттермен жүргізген көпжылдық педагогикалық тәжірибесіне және ғылыми-зерттеу жұмыстарына негізделген.
Как написать дипломную работу еңбегі алғаш рет 1977 жылы итальян тілінде жарық көрген. Бұл кітап академиялық зерттеулерді дайындау бойынша ең танымал әрі пайдалы әдістемелік нұсқаулықтардың бірі болып саналады және әлемнің көптеген тілдеріне аударылған.
Сабақ барысында студенттер кітапта ұсынылған негізгі идеялармен танысты: зерттеу тақырыбын дұрыс таңдау, ғылыми дереккөздермен жұмыс істеу, зерттеу материалдарын жүйелеу, дипломдық жұмыстың құрылымын дұрыс қалыптастыру, сондай-ақ ғылыми мәтінді жазу барысында жиі кездесетін қателіктерден аулақ болу жолдары қарастырылды. Кітапта ғылыми жұмыстың идеядан бастап соңғы редакциялауға дейінгі барлық кезеңдері қамтылғандықтан, ол дипломдық жұмыс жазып жатқан студенттер үшін тиімді әдістемелік құрал болып табылады.
Умберто Эко ұсынған қағидаларға сәйкес, дипломдық жұмыстың тақырыбы, ең алдымен, студенттің өзіне қызықты болуы тиіс, сонымен қатар ғылыми тұрғыдан өзекті және терең зерттеу жүргізуге мүмкіндік беретіндей нақты әрі шектеулі болуы қажет. Автордың ұсынымдары студенттерге дипломдық жұмысты табысты жазу дұрыс таңдалған тақырыпқа, ғылыми дереккөздермен жүйелі жұмыс жүргізуге және зерттеу үдерісін тиімді ұйымдастыруға тікелей байланысты екенін түсінуге көмектеседі.
