2 сәуірден бастап «Күміс университет» жобасы аясында Энергетика, автоматтандыру және есептеу техникасы кафедрасы ұйымдастырған «Цифрлық сауаттылық» курсы өтуде.

Бұл курс тыңдаушылардың цифрлық дағдыларын дамытуға және заманауи технологияларды күнделікті өмірде сенімді қолдануға бағытталған.

Оқу барысында қатысушылар компьютермен жұмыс істеудің негіздерін, операциялық жүйелерді және файлдарды ұйымдастыру қағидаларын меңгереді. Сонымен қатар, интернет пен онлайн-сервистерді пайдалану, ақпаратты тиімді іздеу, браузерлер мен электрондық поштамен жұмыс істеу дағдылары қарастырылады.

Курста киберқауіпсіздік мәселелеріне ерекше көңіл бөлінеді: жеке деректерді қорғау, сенімді құпиясөздер құру және интернет-алаяқтықтың алдын алу жолдары түсіндіріледі.

Бағдарлама аясында бұлттық технологиялар, файлдарды сақтау және басқару құралдары, сондай-ақ онлайн байланыс (бейнеқоңыраулар, цифрлық қарым-қатынас ережелері) қамтылады.

Тыңдаушылар цифрлық ортадағы қаржылық сауаттылық негіздерін, онлайн-банкинг пен қауіпсіз төлем жасауды да үйренеді. Сонымен қатар, онлайн-курстар мен цифрлық платформалар сияқты заманауи білім беру және ойын-сауық ресурстары таныстырылады.

Курс «Күміс университет» тыңдаушыларына, сондай-ақ цифрлық сауаттылығын арттырып, заманауи технологияларды меңгергісі келетін барлық азаматтарға арналған.