2026 жылғы 2 наурызда «Көрнекілікке бағытталған оқу материалдарын дайындау әдістемесі» атты шеберлік сабағы өтті. Шеберлік сабағын Энергетика, автоматтандыру және есептеу техникасы кафедрасының магистрі, аға оқытушысы Шатекова А.Н. жүргізді.
Іс-шара педагогикалық шеберлікті дамыту аясында ұйымдастырылып, жасанды интеллект құралдарын пайдалану арқылы көрнекі оқу материалдарын әзірлеудің заманауи тәсілдеріне арналды. Шеберлік сабағы барысында қатысушылар Napkin AI сервисінің мүмкіндіктерімен танысты. Бұл – мәтінді автоматты түрде визуалды элементтерге: диаграммаларға, инфографикаға, сызбаларға, блок-схемаларға және басқа да графикалық көрнекі материалдарға айналдыратын веб-құрал.
Шеберлік сабағында білім беру үдерісінде визуализацияны қолдану әдістемесіне ерекше назар аударылды:
– оқу материалын сызбаларды автоматты түрде генерациялауға ыңғайлы етіп құрылымдау;
– күрделі теориялық тақырыптарды түсінікті визуалды модельдерге айналдыру;
– презентациялар мен үлестірмелі материалдарды дайындауда ЖИ-құралдарын пайдалану;
– студенттердің визуалды ойлау қабілетін дамыту.
Практикалық бөлімде қатысушылар оқу тақырыптарының мәтіндік фрагменттерін көрнекі сызбаларға айналдырып көрді және визуалды педагогиканы оқу үдерісіне енгізу мүмкіндіктерін талқылады.
