2026 жылғы 06-08 сәуір аралығында Батыс Қазақстан инновациялық-технологиялық университетінің Салалық технологиялар институтының оқытушылары Бөкейорда ауданының 11-сынып оқушыларымен кәсіптік бағдар беру кездесулерін өткізді.

Іс-шараларға Ветеринария және техносфералық қауіпсіздік кафедрасының профессоры, ветеринария ғылымдарының докторы Байтілесов Е.У. және кафедра меңгерушісі, химия ғылымдарының кандидаты Байтілесова Л.И. қатысты. Кездесулер Сайқын ауылы, Хан Орда ауылы және Бисен ауылындағы мектептерде өтіп, барлығы 88 түлекті қамтыды.

Оқушыларға БҚИТУ-дың білім беру бағдарламалары, материалдық-техникалық базасы, қабылдау шарттары, академиялық ұтқырлық мүмкіндіктері және түлектердің жұмысқа орналасу перспективалары туралы жан-жақты ақпарат берілді.

Кәсіптік бағдар беру кездесулері барысында білім беру гранттарына түсу мәселесіне ерекше назар аударылды. Оқушыларға мемлекеттік білім гранттары конкурсына қатысу ережелері, Ұлттық бірыңғай тестілеу нәтижелеріне қойылатын талаптар, құжат тапсыру тәртібі, сондай-ақ оқу барысында бос және өзге де білім беру гранттарын алу мүмкіндіктері түсіндірілді. Сонымен қатар студенттерге көрсетілетін ішкі қолдау, академиялық жеңілдіктер және ынталандыру шаралары туралы ақпарат ұсынылды.

Оқытудың артықшылықтарына, соның ішінде әскери кафедраның болуы, сондай-ақ студенттерге арналған жатақхана орындарының және қолайлы тұру жағдайларының қарастырылуы ерекше атап өтілді.

Кездесулер қорытындысы бойынша оқушылар тарапынан жоғары қызығушылық байқалды: түлектер белсенді түрде сұрақтар қойып, БҚИТУ-да оқуға түсуге тұрақты ниет білдіріп, университетті жоғары білім алудағы басым таңдау ретінде қарастыратынын жеткізді.

БҚИТУ Білім беру бөліміне, аудандық білім бөлімінің басшылығына, мектеп директорларына және кәсіптік бағдар берушілерге іс-шараларды ұйымдастыруға көрсеткен қолдауы мен жемісті ынтымақтастығы үшін алғыс білдіреді.