Салалық технологиялар институтының «Энергетика, автоматтандыру және есептеу техникасы» кафедрасының аға оқытушылары Буранова Н.Г. мен Абдрахманова И.Т. Орал трансформатор зауытында 6В017102 – «Электр энергетикасы» және 6В07105 – «Автоматтандыру және басқару (салалар бойынша)» білім беру бағдарламаларының 3-курс білім алушыларына «Электр машиналары» және «Электр машиналары мен электр жетегі» пәндері бойынша практикалық сабақ өткізді. Білім алушылар мен оқытушыларды зауыттың өндіріс жөніндегі директоры Ә.Е. Испанов қарсы алды. Қауіпсіздік техникасы бойынша инженер зауыттағы қауіпсіздік ережелерін таныстырып, оқушылар мен оқытушыларға сақтық шараларын түсіндірді.

Тәжірибелік сабақ барысында студенттер трансформатордың конструкциясын жан-жақты түсініп, әрбір құрылғының бөлшектерін егжей-тегжейлі қарастырды. Олар өндіріс процесінің барлық кезеңдерін — материалды дайындау мен ораудан бастап құрастыруға, сапаны бақылауға және соңғы дайын өнімге дейін бақылай алды. Тәжірибелік сабақ қатысушыларға кәсіпорынның толық өндірістік циклмен қалай жұмыс істейтінін көруге мүмкіндік берді, бұл электр машиналары мен электр жетектерінің жұмысының теориялық негіздері мен практикалық аспектілерін тереңірек түсінуге ықпал етті. Алынған тәжірибе білім алушылардың кәсіби ой-өрісін кеңейтіп, пәндерді әрі қарай оқуға және таңдаған мамандығы бойынша дамуға деген ынтасын арттырды.