Ташкент мемлекеттік техникалық университетімен ынтымақтастық аясында мұнай-газ инженериясы кафедрасының оқытушылары Калешева Г.Е. және Акмалиева А.Б. «Мұнай мен газды өндіруден бастап өңдеуге дейін: инновациялар және жасанды интеллект» атты халықаралық ғылыми-практикалық конференцияға қатысты.
Конференция техника ғылымдарының докторы, Өзбекстан Республикасының еңбегі сіңген өнертапқышы Сұлтан Назарович Назаровтың туғанына 100 жыл толуына арналды. Іс-шара 2026 жылғы 19 қарашада онлайн форматта өтті.
Пленарлық отырыста Акмалиева А.Б. баяндама жасады. Баяндама тақырыбы: «Қаражанбас жоғары тұтқырлы мұнай кен орнын игерудің термиялық әдістерінің тиімділігін бағалау». Баяндамада қиын алынатын жоғары тұтқырлы мұнай қоры бар кен орындарын игеруде жылулық технологияларды қолдану мәселелері, сондай-ақ олардың нәтижелілігін Қаражанбас кен орны мысалында бағалау қарастырылды.
Конференцияға қатысу Өзбекстан мен басқа елдердің әріптестерімен ғылыми тәжірибе алмасуға, көмірсутектерді өндіру мен өңдеудің заманауи тәсілдерін, сондай-ақ мұнай-газ саласындағы цифрлық технологиялар мен жасанды интеллекттің рөлін талқылауға мүмкіндік берді. Ташкент мемлекеттік техникалық университетімен ынтымақтастық жоғары оқу орындары арасындағы ғылыми және білім беру байланыстарын нығайтып, бірлескен зерттеулер үшін жаңа мүмкіндіктер ашады.
