2026 жылғы 14 қазанда Батыс Қазақстан инновациялық-технологиялық университетінің Салалық технологиялар институтында «Киберқауіпсіздік: цифрлық кеңістікте өзін-өзі қорғау мәдениеті» тақырыбында кездесу өтті. Іс-шараны университет пен Батыс Қазақстан облысының Полиция департаменті арасындағы ынтымақтастық туралы меморандум аясында институттың комплаенс-қызметі ұйымдастырды.
Кездесуге полиция қызметкерлері, комплаенс-қызмет құрамындағы оқытушылар және студенттер қатысты. Кибералаяқтықтан қорғану, құқықтық және цифрлық сауаттылықты арттыру, сондай-ақ жастар арасындағы құқық бұзушылықтардың алдын алу мәселелері талқылаудың негізгі тақырыптарына айналды.
Кездесудің модераторы институттың комплаенс-қызметінің басшысы, құқық кафедрасының қауымдастырылған профессоры, заң ғылымдарының кандидаты Т. Х. Рахметов болды. Ол кездесуді аша отырып, киберқұқық бұзушылықтарға қарсы іс-қимылдың және цифрлық ортада жауапты мінез-құлық қалыптастырудың өзектілігін атап өтті. Академиялық адалдық, парасаттылық және заңға құрмет қағидаттарын сақтауға ерекше назар аударылды.
Студенттер алдында Батыс Қазақстан облысы Полиция департаментінің өкілдері: Киберқұқық бұзушылықтарға қарсы іс-қимыл басқармасының аға жедел уәкілі, полиция майоры Г. Н. Мурзагалиев; Қоғамдық қауіпсіздік басқармасының ерекше тапсырмалар жөніндегі аға инспекторы, полиция майоры Алишер Нурланович Утегенов; Ұйымдасқан қылмысқа қарсы күрес басқармасының жедел уәкілі, полиция аға лейтенанты М. Е. Кадыров сөз сөйледі.
Полиция қызметкерлері интернет-алаяқтықтың кең таралған схемалары, қаскөйлер пайдаланатын цифрлық құралдар және заңнамада көзделген жауапкершілік туралы баяндады. Азаматтардың дропперлікке, яғни заңсыз қаржылық операциялар жүргізу үшін банк карталарын, деректемелерін және шоттарға қол жеткізу мүмкіндігін үшінші тұлғаларға беруге тартылу қаупі жеке қарастырылды. Қатысушыларға алаяқтық әрекеттерін қалай тануға болатыны және күмәнді жағдайлар туындағанда қандай әрекет жасау керектігі түсіндірілді.
Полиция қызметкерлерінің айтуынша, өңірде киберқылмыстар мен анықталған дропперлік фактілерінің саны артып келеді. Ведомство өкілдері киберқұқық бұзушылықтарға қарсы іс-қимыл жөніндегі мамандандырылған бөлімшенің жұмысы туралы да айтып берді.
Кездесу барысында «Заң және тәртіп» тұжырымдамасын іске асыру, жастар мен кәмелетке толмағандар арасындағы құқық бұзушылықтардың алдын алу, жол жүрісі қағидаларын сақтау мәселелері қозғалды. Полиция қызметкерлері қоғамдық және жол қауіпсіздігін қамтамасыз ету үшін цифрлық технологияларды қолдану мысалдарын келтіріп, әкімшілік жауапкершілік шараларын түсіндірді. Буллингтің алдын алуға және қорқытып алушылық үшін көзделген жауапкершілікке де ерекше назар аударылды.
Баяндамалар тақырыптық бейнероликтермен толықтырылды. Студенттер сұрақтар қойып, мамандардан түсініктемелер алды.
Институттың тәрбие бөлімінің басшысы К. Б. Каиржанов БҚИТУ-дың Мінез-құлық қағидалары мен Ар-намыс кодексін сақтау қажеттігін еске салды. Ол өзара сыйластықтың, әдепті қарым-қатынастың және заңнама талаптарына жауапкершілікпен қараудың маңызын атап өтті.
Кездесу соңында Т. Х. Рахметов полиция қызметкерлеріне мазмұнды сұхбат пен студенттердің құқықтық және цифрлық сауаттылығын арттыруға қосқан үлесі үшін алғыс білдірді.
