Салалық технологиялар институтының Құқық кафедрасында студенттерге арналған ғылыми үйірме – «Жас криминалист» қатысушылары үшін таныстырылым шарасы өтті.

Кездесудің басты мақсаты – студенттерді жаңа оқу жылына арналған үйірменің міндеттері мен жұмыс жоспарымен таныстыру, сондай-ақ кафедраның материалдық-техникалық базасын көрсету болды. Бұл база болашақ мамандардың практикалық дағдыларын дамытуға мүмкіндік береді.

Үйірме жетекшісі аға оқытушы, заң ғылымдарының магистрі Отеуова А.К. «Жас криминалист» үйірмесінің негізгі міндеттеріне мыналарды жатқызды:

криминалистикалық әдістерді нақты қызмет барысында қолдану бойынша практикалық дағдыларды дамыту;

криминалистика саласындағы өзекті мәселелер бойынша студенттердің оқу-зерттеу жұмыстарын жүргізу;

ғылыми-практикалық конференцияларға, олимпиадалар мен байқауларға қатысу;

зерттеушілік мәдениетті және топпен жұмыс істеу дағдыларын қалыптастыру;

құқық қорғау органдарының мамандарын шақыра отырып, мастер-кластар ұйымдастыру.

Студенттерге оқу жылына арналған жұмыс жоспары таныстырылды. Жоспарға келесі практикалық сабақтар кірді: оқиға болған жерді қарау, қол мен аяқ киім ізіне талдау жасау, цифрлық дәлелдемелерді зерттеу, сондай-ақ республикалық және халықаралық студенттік конференцияларға қатысу. Іс-шара барысында қазіргі заманғы криминалистикалық құрал-жабдықтардың мүмкіндіктеріне ерекше назар аударылды.

Криминалистикалық құралдармен танысу

Криминалистикалық чемодан

Оқиға болған жерді қарау кезінде қолданылады және қажетті құралдарды қамтиды: қолғаптар, пинцеттер, герметикалық пакеттер, дактилоскопиялық ұнтақтар, қылқаламдар, іздерді алу үшін скотч, фотоаппарат және басқа материалдар. Студенттерге айғақтарды орау және сақтау ережелері түсіндірілді.

Өтірік анықтағыш (полиграф)

Психофизиологиялық зерттеулер жүргізу үшін қолданылады. Құрылғы тыныс алу жиілігін, тамыр соғысын, қан қысымын және терінің электрлік белсенділігін тіркейді. Бұл жасырын эмоциялық реакцияларды анықтауға мүмкіндік береді. Студенттерге полиграфты ҚР қылмыстық процесінде қолданудың құқықтық шектеулері түсіндірілді.

Тозаң іздерін алу үшін электростатикалық құрал

Көру немесе көрінбейтін аяқ киім ізі, шина ізі немесе басқа да объектілердің іздерін түрлі беттерден анықтап, бекіту үшін қолданылады. Құрылғы электростатикалық өріс жасап, шаң бөлшектерін арнайы пленкаға бекітеді, бұл іздің ұсақ бөлшектерін нақты сақтауға мүмкіндік береді.

Дактилоскопия құралдары

Бұған саусақ іздерін анықтау және бекітуге арналған құралдар кіреді: ұнтақтар, магнитті қылқаламдар, арнайы пленкалар.

Фото және бейнетехника

Оқиға орнын және айғақтарды жоғары сапалы кескінмен тіркеу үшін қолданылады.

Жарықтандыру құралдары және лазерлік көздер

Көзге көрінбейтін биологиялық сұйықтықтардың, талшықтардың, микронысандардың іздерін анықтау үшін пайдаланылады.

Кездесу барысында студенттер тек құрылғылармен танысып қана қоймай, криминалист рөлінде өздерін сынап көрді: дактилоскопиялық жиынтықтармен жұмыс істеді, саусақ іздерін табу үшін ұнтақтарды пайдаланды, электростатикалық құрал арқылы тозаң іздерін бекітті.

Іс-шара еркін сұхбат форматында өтті – қатысушылар құрылғыларды қолдану тәртібі, тергеу әрекеттеріндегі заңдылықтар және Қазақстанда криминалистиканың даму болашағы туралы сұрақтар қойды.

Студенттер кафедраның құрал-жабдықтарымен танысу теориялық білімді тәжірибемен ұштастыруға және болашақ мамандықта қажет болатын дағдыларды қалыптастыруға көмектесетінін атап өтті.